महिला टि–२० विश्वकपः दक्षिण अफ्रिकालाई हराउँदै अष्ट्रेलिया सेमिफाइनलमा

एजेन्सी /७ फागुन, अष्ट्रेलियाले महिला टि–२० विश्वकप २०२३ को सेमिफाइनलमा स्थान बनाएको छ । घरेलु टोली दक्षिण अफ्रिकालाई ६ विकेटले हराउँदै अष्ट्रेलिया सेमिफाइनलमा पुग्ने पहिलो टोली बनेको हो । जितको लागि १ सय २५ रनको लक्ष्य पाएको अष्ट्रेलियाले १६.३ ओभरमा ४ विकेट गुमाउँदै पूरा गर्यो । अष्ट्रेलियाको तर्फबाट ब्याटिङ गरेकी ताहलिया म्याकग्राथले ३३ बलमा १० चौकासहित ५७ रन बनाईन् । एलिसा गार्डनर २८, बेथ मुनी २० र एलिसा हेली ११ रनको योगदान दिए । यस्तै, बलिङमा दक्षिण अफ्रिकाकी मरिजान कप्पले ४ ओभरमा २१ रन खर्चेर २ विकेट लिइन् ।

त्यसअघि टस हारेर पहिला ब्याटिङ गरेको दक्षिण अफ्रिकाले २० ओभरमा ६ विकेट गुमाउँदै १ सय २४ रन बनायो । दक्षिण अफ्रिकाको तर्फबाट तजिमन ब्रिट्सले ३६ बलमा ६ चौका र १ छक्कासहित सर्वाधिक ४५ रन लिइन् । यस्तै, बलिङतर्फ अष्ट्रेलियाकी जर्जिया वेयरहामले ३ ओभरमा १८ रन खर्चेर २ विकेट लिइन् ।

अपराजित रहदै आएको अष्ट्रेलियाले ४ खेलमा ८ अंकका साथ समूह ए को शीर्ष स्थानमा रहेको छ । सेमिफाइनलमा अष्ट्रेलियाले समूह बी को उपविजेतासँग खेल्नेछ । समूह बी मा इंग्ल्यान्ड ३ खेलमा ६ अंकका साथ शीर्षस्थानमा रहेको छ । भारत ३ खेलमा २ जित र १ हारसहित ४ अंकका साथ दोस्रो स्थानमा छ भने पाकिस्तान २ खेलमा १ मा जित र १ मा हारसहित तेस्रो स्थानमा छ ।