सांसद चन्द्र भण्डारीको स्वास्थ्यमा सुधार, मुखबाट खाना दिन थालियो

काठमाडौं । नेपाली कांग्रेसका सांसद डा‍. चन्द्र भण्डारीको स्वास्थ्यमा सुधार हुँदै गएको छ । खाना पकाउने ग्यास चुहिएर दुर्घटना हुँदा घाइते भएका भण्डारीको स्वास्थ्यमा क्रमश सुधार हुँदै गएको हो ।

भारतको मुम्बईस्थित नेशनल बर्न अस्पतालमा उपचाररत भण्डारीको स्वास्थ्यमा सुधार हुँदै गएको उनको सचिवालय जनाकारी दिएका छन् । यसअघि पाइपबाट खाना खुवाउँदै आएकामा बुधबारदेखि भने मुखबाटै खाना खुवाइएको छ भने प्रेसर मास्क अक्सिजन पाँच लिटरमा झारिएको छ ।

यही फागुन ३ गते राति काठमाडौंको बुद्धनगरस्थित निवासमा भएको दुर्घटनामा सांसद भण्डारीसहित उनकी आमा हरिकला घाइते भएकी थिए । घटनालगत्तै दुवै जनाको कीर्तिपुरस्थित कीर्तिपुर बर्न अस्पतालमा उपचार गरिएको थियो । आमा हरिकलाको भने उपचारका क्रममा बिहीबार बिहान निधन भएको थियो ।

नेता डा भण्डारीलाई नेपालमा यथोचित उपचार सम्भव नभएपछि गत बिहीबार नै श्री एयरलाइन्सको विमानमार्फत मुम्बई लगिएको थियो । नेता भण्डारीको दुवै हात र दुवै गोडा गरी २५–३० प्रतिशत जलन भएको थियो ।