पत्रकार सुनील महर्जन सम्मानित 

ललितपुर । भीमसेन मन्दिर पुनः निर्माण सरोकार समितिले पत्रकार सुनील महर्जनलाई सम्मान गरेको छ । पाटन दरबार क्षेत्रमा अवस्थित सो मन्दिर उपभोक्ता समितिमार्फत  पुनः निर्माण गर्न विसं २०७२ सालको भूकम्पपछिदेखि नै पत्रकारिता मार्फत महत्त्वपूर्ण योगदान पुयाएको भन्दै महर्जनलाई सम्मान गरिएको हो ।

 उनी नेपाल समाचारपत्रका सहायक सम्पादक  तथा नेवास् पत्रकार राष्ट्रिय दबूका वरिष्ठ उपाध्यक्ष  हुन्  । २०७२ सालको भूकम्पबाट क्षतिग्रस्त सो मन्दिर क्षतिग्रस्त भएको थियो । ललितपुर उद्योग वाणिज्य संघको अगुवाइमा गठित सो समितिले पाटन सङ्ग्रहालय परिसरमा मंगलबार आयोजना गरेको एक समारोहका बीच ललितपुर महानगरपालिकाका प्रमुख  चिरिबाबु महर्जनले सहायक सम्पादक महर्जनलाई कदर पत्र प्रदान गरेका हुन्  ।

समारोह समितिका अध्यक्ष कृष्णलाल महर्जनले सो मन्दिरको पुनः निर्माण सम्पदा संरक्षणमा निजी क्षेत्र र स्थानीयको भूमिकाको ठोस उदाहरण रहेको बताए ।  भीमसेन मन्दिर पुन निर्माणले सम्पदा संरक्षणमा स्थानीयको भूमिका महत्त्वपूर्ण रहेको पुष्टि गरेको पनि अध्यक्ष महर्जनको भनाई रहेको छ । मन्दिर पुनः निर्माणको कूल लागत ४ करोड ९३ लाख रकममध्ये अत्यधिक हिस्सा जनस्तरको रहेको छ । सो अवसरमा मन्दिर पुनः निर्माण गर्ने कालिगडहरूलाई सम्मान गरिएको थियो ।