अव्यवस्थित तारलाई एक साताभित्र हटाउन महानगरपालिकाको निर्देशन

काठमाडौं । ललितपुर महानगरपालिकाले अव्यवस्थित तारलाई एक साताभित्र हटाउन निर्देशन दिएको छ । शुक्रबार एक सूचना जारी गर्दै महानगरले सडक किनारामा राखिएका अव्यवस्थित तारले सहरलाई कुरुप बनाएको भन्दै हटाउन सम्बन्धित सेवाप्रदायकलाई निर्देशन दिएको हो ।

इन्टरनेट सेवाप्रदायक र नेपाल टेलिकमका अव्यवस्थित तार तथा सडकको पोल पोलमा राखिएका तारका अनावश्यक मुठाहरू हटाउन एक साताको समय दिएको हो ।

महानगरपालिकालाई सुन्दर र स्मार्ट सहर बनाउने हाम्रो अभियानलाई चुनौती दिँदै महानगरपालिका क्षेत्रभित्र कार्यरत इन्टरनेट सेवा प्रदायक संस्था तथा नेपाल टेलिकमद्वारा सडक किनारामा राखिएका अव्यवस्थित तार तथा सडकको पोल पोलमा राखिएका तारका अनावश्यक मुठाहरूले शहरलाई नै कुरूप पारेको हुँदा महानगरपालिका सम्बन्धित निकायहरुलाई विशेष ध्यानाकर्षण गराउँदछौँ, सूचनामा भनिएको छ ।