बैठकबाट बाहिरिँदै महामन्त्री थापाले भने : ‘राष्ट्रपतिबारे ५ बजे ठोस निर्णय गर्छौ’

काठमाडौं । चुनावअघिको सत्ता गठबन्धनमा रहेका चार दलले आज अपराह्न ५ बजे पुनः बैठक बस्ने गरि बालुवाटारमा भएको छलफल सकिएको छ । छलफलमा राष्ट्रपतिबारे विभिन्न कोणबाट राष्ट्रपतिको उम्मेदवारबारे छलफल भएपनि पुनः छलफल गर्ने भएका हुन् ।

बैठकबाट बाहिरिँदै कांग्रेस महामन्त्री गगन थापाले बैठक राष्ट्रपतिमै केन्द्रित भएको बताएका छन् । उनले राष्ट्रपतिको विषयमा पाँच बजे बस्ने बैठकले टुंग्यो लगाउने बताएका हुन् । थापाका अनुसार कांग्रेस र बाँकी तीन दलले राष्ट्रपतिमा आ आफ्नो प्रस्ताव राखेका छन् । आफ्नो आफ्नो दलमा छलफल गरेर साँझ ५ बजे टुंग्याउने गरी अहिले नेताहरू उठेको उनले जनाकारी दिए ।

उनले भने, ‘सबैले आ आफ्नो दलमा छलफल गरेर भरे ५ बजे बस्छौं, भरे ५ बजेको बैठकपछि हामी एकै ठाउँ उभिन्छौं कांग्रेसले माओवादी, नेकपा एस र जसपासँग छलफल गरेका छौं । विभिन्न विकल्पबारेमा प्रस्ताव आएको छ । छलफल सकारात्मक छ । फेरि आआफ्नो दलमा साँझ पाँच बजे बस्नेगरी टुंग्याउछौं ।’

पाँच बजे बसेर एकैठाउँमा उभिएर ठोस निर्णय गर्ने उनको भनाई थियो । बैठकमा नेपाली कांग्रेसका सभापति शेरबहादुर देउवालगायतले राष्ट्रपतिमा आफूहरूलाई सहयोग गर्नुपर्ने प्रस्ताव राखेका थिए । कांग्रेसबाहेक अन्य दलले पनि सहमतिको राष्ट्रपति उम्मेदवारबारे कुराकानी राखेका थिए ।