‘माधव राष्ट्रपतिका उम्मेदवार भए एमालेले समर्थन गर्छ’ : पृथ्वी सुब्बा गुरुङ

काठमाडौं । नेकपा एमालेका उपमहासचिव पृथ्वीसुब्बा गुरुङले राष्ट्रपतिको उम्मेदवार माधव नेपाल भए समर्थन गरेर जाने बताएका छन् । उनले नेपाल पुरानो गठबन्धनबाट उम्मेदवार भएमा आफुहरुलाई नैतिक संकट पर्ने भन्दै एमालेले समर्थन गरेर जाने तयारी गरेको बताएका हुन् ।

उनले भने, ‘राष्ट्रपतिको विषयमा कुनै पिक्चर स्पष्ट भएको छैन । को राष्ट्रपति हुन्छ भन्नेमा कुनै टुंगो । यदि माधव नेपाल नै पुरानो गठबन्धनबाट उम्मेदवार भएमा हामीलाई नैतिक संकट पर्छ । उनलाई मत हालेर जान्छौं । पार्टीको कोही उम्मेदवार हुने छैन ।’

तर, एमालेले राष्ट्रपतिका विषयमा शनिबार बिहान ९ बजे बस्ने सचिवालय बैठकले आधिकारिक निर्णय गर्ने गुरुङले बताए । एमाले अध्यक्ष केपी शर्मा ओली नेपाललाई राष्ट्रपति बनाएर एकीकृत समाजवादीलाई आफ्नो पार्टीमा मिसाउने रणनीतिमा लागेका छन् ।

प्रचण्डले पूर्वसहमति अनुसार एमालेलाई राष्ट्रपति नदिने देखेपछि ओलीले नेकपा एसका अध्यक्ष माधव नेपाललाई राष्ट्रपति बनाउन प्रस्ताव गरेका थिए । अहिले पनि पुरानो गठबन्धनमा पनि नेता नेपाल र कांग्रेसको दाबी परेको छ । एमालेबाहेक पुरानो गठबन्धनबाट राष्ट्रपतिमा साझा उम्मेदवार अघि सार्न ठोस निर्णयका लागि ५ बजे पुरानो गठबन्धनको बैठक बोलाइएको छ ।