‘सहिदहरुलाई धोका दिने प्रचण्डले आफूलाई धोका दिनु कुनै अनौठो कुरा हैन’ : अध्यक्ष ओली

काठमाडौं । नेकपा एमालेका अध्यक्ष केपी शर्मा ओलीले जनयुद्ध, सहिद तथा घाइते परिवारलाई धोका दिँदै आएका प्रधानमन्त्री पुष्पकमल दाहाल प्रचण्डले आफूलाई धोका दिनु कुनै अनौठो नभएको बताएका छन् । आइतबार काठमाडौंमा भएको सहिद परिवार र घाइतेको सम्मानमा आयोजित कार्यक्रममा बोल्दै अध्यक्ष ओलीले एउटा भाषा बोल्ने र काम अर्कै गर्ने नेता प्रचण्ड रहेको बताएका हुन् ।

उनले भने, ‘मलाई धोका दिनु कुनै ठुलो कुरा होइन । उहाँले मलाई २ महिना कस्तो गाह्रो भएको थियो भनेको सुने, हरियो देख्नै नहुने दाम्लो चुँडाउन खोजिहाल्ने अनि मैले रोकिदिने । अनि गाह्रो त हुने नै भयो । २०६३ पछि सबैभन्दा धेरै समय सरकारमा रहने प्रचण्ड र उनको पार्टी हो । ३ पटक त उहाँ प्रधानमन्त्री नै हुनुभयो । प्रधानमन्त्री भएको ३ वर्ष भयो, सरकारमा बसेको त कति भयो भयो ? २०६३ पछि कोही पनि त्यति लामो समय अरू सत्तामा छैन । तर परिवारका सदस्य, भाञ्जाभाञ्जी भाइ भतिजालाई राम्रै भएको होला तर अहिले प्रधानमन्त्रीजीले घाइते र सहिदका परिवार सम्झनुभएको छ कि छैन । उहाँले चलाएको जनयुद्ध उहाँलाई सम्झना छ कि छैन ? उनले प्रचण्डलाई कसका विरुद्ध किन जनयुद्ध सुरु गर्नुभएको थियो ? भन्दै प्रश्न गरे ।

अध्यक्ष ओलीले जनयुद्धका नाममा प्रचण्डले हिंसाको अभियान सुरु गरेको पनि बताए । जसका कारण आन्दोलनरत र राज्य पक्षबाट थुप्रै मानिसको हत्या भएको बताए । यस बीचमा लोकतन्त्रका लागि एउटा प्रयास गरिएपनि उनी जनताका समस्या समाधान गर्ने भन्दा पनि आफ्नै स्वार्थमा हिँडिरहेको बताए ।