सदभाव र रगंको पर्व होली : बसन्तपुरमा ठड्याइयो चीर

काठमाडौं । फागु अर्थात् रंगहरुको पर्व होली सोमबार सुरु भएको छ । काठमाडौंको वसन्तपुरस्थित हनुमानढोकामा आइतबार बिहान ७ बजेर ४५ मिनेटको शुभसाइतमा चीर ठड्याएसँगै यो वर्षको होली पर्व विधिवत रुपमा सुरु भएको हो ।

हनुमानढोका दरबारको दक्षिण पटांगिनी, ऐतिहासिक मोहनकाजी चोक तथा दाखचोकमा रंगीविरंगी ध्वजापताकासहितको चीर ठड्याइएको हो । योसँगै देशभर औपचारिक रूपमा फागु पर्व सुरु भएको छ । चीर ठड्याएसँगै हनुमान ढोका दरबार क्षेत्रमा गुरुजुको पल्टनले तोप पड्काएर हर्षबढाइँ गरी अबिर छर्किई होली पर्वको स्वागत गरेको छ ।

पर्व परम्पराअनुसार फाल्गुनशुक्ल अष्टमीदेखि पूर्णिमासम्म ८ दिन फागु मनाउने चलन छ  । भगवान कृष्णले गोपिनीहरु नुहाउन गएका बेला कपडा चोरेर रुखमा झुन्ड्याइदिएको पौराणिक कथाको स्मरणमा चीर ठड्याउने परम्परा रहिआएको छ । प्रत्येक वर्षको फागुन शुल्क अष्टमीको दिन चीर ठड्याएसँगै फागु पर्व आरम्भ हुन्छ । अन्तिम दिन चीर ढालिएसँगै पर्व समापन गरिन्छ ।

यस वर्षको होली पर्वको मुख्य दिन फागुन २२ र २३ गते परेको छ । यस वर्ष काठमाडौँ उपत्यकासहित पहाडी क्षेत्रमा २२ गते र २३ गते तराई जिल्लामा होलीको सार्वजनिक बिदा दिइएको छ ।

पौराणिक कथनअनुसार हिरण्यकसिपुले आफ्नै छोरा प्रह्लादलाई मार्न आफ्नी बहिनी होलिकाको काखमा बसाली आगो लगाइदिएका थिए  । तर आगोले विष्णुका भक्त प्रह्लादलाई छोएन । बरु होलिका नै भस्म भइन् । यसरी होलिकारूपी पापवृत्ति जलेर भस्म भएको सम्झनामा प्रत्येक वर्ष फाल्गुण शुक्लपूर्णिमाको रातमा होलिकाको प्रतीक चीरदाह गरेसँगै होली पर्व समापन हुनेछ ।