एमालेले गर्यो समर्थनसहित सरकार छाड्ने निर्णय, मन्त्रीहरुले आजै राजीनामा बुझाउने

काठमाडौं । नेकपा एमालेले पुष्पकमल दाहाल प्रचण्ड नेतृत्वको सरकार छाड्ने र समर्थन पनि फिर्ता लिने निर्णय गरेको छ । आज बिहान बसेको सचिवालय बैठकले समर्थनसहित सरकार छाड्ने निर्णय गरेको हो ।

पार्टीको सचिवालय बैठकबाट सरकारबाट फिर्ता हुने र समर्थन पनि फिर्ता लिने निर्णय गरेसँगै एमाले मन्त्रीहरुले आजै राजीनामा बुझाउने भएका छन् । उपप्रधानमन्त्री तथा अर्थमन्त्री विष्णु पौडेलले बैठकका निर्णयसँगै राजीनामा पनि बुझाउने जानकारी गराएका हुन् । पौडेलले पुस १० मा एमालेलाई राष्ट्रपति दिने गरी भएको सहमति पालनामा प्रधानमन्त्री प्रचण्ड गम्भीर भएर नलागेको भन्दै बैठकले सरकारमाथिको समर्थन फिर्ता लिने निर्णय गरेको बताए ।

एमालेले प्रदेश सरकारका विषयमा भने कुनै नयाँ निर्णय लिएको छैन् । उपाध्यक्ष पौडेलले सरकारबाट हट्ने र समर्थन फिर्ता लिने निर्णय संघीय सरकारको हकमा मात्रै भएको बताएका छन् । एमालेबाट ३ वटा प्रदेशमा मुख्यमन्त्री चयन भएका छन् । थप ३ प्रदेशमा सरकारमा सहभागी छ ।