कस्तो छ सांसद चन्द्र भण्डारीको स्वास्थ्य अवस्था

काठमाडौं । ग्यास लिकपछि आगलागीमा परी घाइते भएका नेपाली कांग्रेसका नेता एवम् प्रतिनिधिसभा सदस्य डा चन्द्रकान्त भण्डारीको पछिल्लो स्वास्थ्य अवस्था सुधारोन्मुख रहेको छ । राम्रोसँग बोल्ने र खाना पनि राम्रोसँग खाइरहेको उनका नातेदारले बताएका छन् । भारतको मुम्बईस्थित नेसनल बर्न सेन्टरमा उपचाररत भण्डारीको स्वास्थ्यमा सुधार आएपछि राम्रोसँग बोल्ने र खाना खान सक्ने भएका छन् । भण्डारीलाई अहिले ज्वरो नआएको र सुन्निएको भागसमेत घट्दै गएकाले स्वास्थ्य सामान्यतर्फ गइरहेको उनका नातेदारले बताएका छन् ।

भण्डारीको मंगलबार आज दायाँ हातको अपरेसन गरिने भएको छ । सांसद भण्डारीलाई अस्पतालमा भर्ना गरिएको आज १३औँ दिन हो । देब्रे हातका औँलाको पनि अपरेसन गर्नुपर्ने हुन सक्ने चिकित्सकले बताएको उनले जानकारी दिएका छन् । उनका अनुसार संक्रमण हुन सक्ने कारणले शुभेच्छुक र आगन्तुकलाई सांसद भण्डारीसित भेटघाट गर्न दिइएको छैन ।

यही फागुन ३ गते काठमाडौंको बुद्धनगरस्थित घरमा खाना पकाउने ग्यास लिक भई आगलागी भएको थियो । घटनालगत्तै दुवैजनाको कीर्तिपुरस्थित कीर्तिपुर बर्न अस्पतालमा उपचारका लागि भर्ना गरिएको थियो । आमा हरिकलाको भने उपचारका क्रममा बिहीबार बिहान निधन भएको थियो ।

नेता भण्डारीलाई नेपालमा यथोचित उपचार सम्भव नभएपछि बिहीबार नै श्री एयरलाइन्सको विमानमार्फत भारतको मुम्बईस्थित नेसनल बर्न सेन्टरमा थप उपचारका लागि लगिएको थियो। नेता भण्डारीको दुवै हात र दुवै गोडा गरी २५–३० प्रतिशत जलन भएको थियो।