‘पुस १० को गल्तीलाई सच्चाएर गठबन्धन भत्कायौँ’ : महामन्त्री थापा

काठमाडौं । नेपाली कांग्रेसका महामन्त्री गगन थापाले पुस १० मा भएको गल्तीलाई सच्चाएर अस्वाभाविक रूपमा बनेको गठबन्धन घाम लागेका बेलामा भत्काएको टिप्पणी गरेका छन् । मंगलबार काठमाडौंमा आयोजित कार्यक्रममा बोल्दै उनले यस्तो बताएका हुन् ।

एमालेसँगकै गठबन्धन बलियो बनाएको भए माओवादी केन्द्रका अध्यक्ष प्रचण्डले धेरै वर्ष प्रधानमन्त्री बन्न सक्ने ठाउँ भएको महामन्त्री थापाले दाबी गरेका छन् । उनले आफू प्रधानमन्त्री बन्ने विषयमा मात्र नसोचेको उनको भनाई छ ।

उनले भने, ‘माओवादी केन्द्रको अध्यक्षले आफू प्रधानमन्त्री मात्रै हुने कुरा सोचेको भए आजको दिनमा एमालेसँग भएको गठबन्धन छोड्नै पर्दैनथ्यो । एमालेसँगको गठबन्धनमा पनि राष्ट्रपति एमालेले पाउँथ्यो । माओवादीले पाउँदैनथ्यो । अहिलेको गठबन्धनमा कांग्रेसको उम्मेदवार बन्नुभएको छ । यो गठबन्धनमा आएर माओवादीले धेरै कुरा पाएको होइन ।’

उनले प्रचण्ड मात्रै नभएर एकीकृत समाजवादीका अध्यक्ष माधव नेपाल पनि चाहेको भए राष्ट्रपति बन्न सक्ने अवस्था बनेको उनको भनाई थियो ।