किन गए पूर्वराजा ज्ञानेन्द्र भारत भ्रमणमा

काडमाडौं । नेपालका पूर्वराजा ज्ञानेन्द्र वीर विक्रम शाह भारत प्रस्थान गरेका छन् । नेपालबाट सोमबार झापाको स्थलमार्ग हुँदै उनि भारत पुगेका हुन् । उनी भारतीय प्रधानमन्त्री नरेन्द्र मोदीको विशेष निम्तोमा भारतको बागड़ोरा गएका हुन् ।

स्रोतले पूर्वराजालाई रिसिभ गर्नका लागि भारतीय प्रधानमन्त्री मोदीका एक जना सल्लाहकार बागडोगरा आएको र उनले पूर्वराजालाई त्यहाँ हिजो रिसिभ गरेको दावी गरेको छ । त्यसपछि पूर्वराजा दिल्ली गए की गएनन् भन्ने स्पष्ट भएको छैन । नेपालका राजनीतिक दलहरु सत्ताको आपसी खिचातानीमा लिप्त भएको मौकामा पूर्वराजा ज्ञानेन्द्रले छिमेकी मुलुक भारतको साथ खोज्ने प्रयास विगत लामो समयदेखि गर्दै आएका थिए । यसअघि पनि उनी विभिन्न वाहनामा भारतको भ्रमणमा गएका थिए ।

पछिल्ला दिनहरुमा नागरिक बचाऊ अभियानमा भारतको राष्ट्रिय स्वयं सेवक संघ९आरएसएस०को विशेष सहयोग रहँदै आएको बताइएको छ जसको उद्घाटन झापाबाट पूर्वराजा ज्ञानेन्द्रले नै गरेका थिए । यो अभियानको नेतृत्व दुर्गा प्रसाईंले गर्दै आएका छन् । फागुन ७ गते प्रजातन्त्र दिवसको दिन पूर्वराजा ज्ञानेन्द्रबाट जारी भएको विज्ञप्तिमा राजनीतिक दलहरुले राजसंस्थासँग सहकार्य गर्नु पर्ने धारणा अघि सारेका थिए ।

विगत केही समयदेखि पूर्वराजाका विज्ञप्तिहरु राजनीतिकरुपले खरो बन्दै आएका छन् । यो परिस्थितिमा पूर्वराजाको भारत भ्रमणलाई निकै अर्थपूर्ण मानिएको छ । नेपालको केन्द्रीय सत्तामा एकपछि अर्को अस्थिरताका घटना हुनु, यी सबै अस्थिरतामा भारतकै भित्री हात हुनु, प्रधानमन्त्री पुष्पकमल दाहाल प्रचण्ड, शेरबहादुर देउवा र अन्य गठबन्धनका नेताहरु भारतीय इशारामा सत्ताको गठजोडमा संलग्न हुनु र फेरि पनि थप अस्थिरताकै संकेतहरु देखिनुले पूर्वराजालाई भारतसँग सहकार्य गरेर पुन गद्दीमा फर्किन सकिन्छ कि भन्ने हिम्मत पलाएको हुनसक्ने बताइएको छ ।