‘विश्वासको मत र मन्त्रिपरिषद् विस्तारको काम राष्ट्रपतिको चुनाव पछि मात्र हुन्छ’ : सञ्चारमन्त्री शर्मा

काठमाडौं । सञ्चार तथा सूचना प्रविधिमन्त्री रेखा शर्माले मन्त्रिपरिषद् विस्तार राष्ट्रपति निर्वाचनपछि मात्रै गर्ने बताएकी छन् । मंगलबार मन्त्रिपरिषद्का निर्णय सुनाउन मन्त्रालयमा आयोजित पत्रकार सम्मेलनमा उनले प्रधानमन्त्रीले विश्वासको मत र मन्त्रिपरिषद् विस्तारको काम निर्वाचनपछि मात्रै गर्ने बताएकी हुन् ।

उनले भनिन्, ‘अहिले हामी राष्ट्रपतिको चुनावको नजिक छौँ । राष्ट्रपतिको चुनावको नजिक भइराखेको हुनाले ध्यान त्यतातिर केन्द्रित पनि छ । त्यसकारणले राष्ट्रपतिको चुनाव पछाडी पनि हुनसक्छ । राष्ट्रपतिको चुनाव अगाडी हुन्छ भन्ने कुराको कुनै मिति किटान भएको छैन । संवैधानिक परिधि, सीमाभन्दा बाहिर नजाने गरेर विश्वासको मत लिने कार्यक्रम हुन्छ ।’

मन्त्रालय बाँडफाँट तत्काल गर्दा उत्पन्न हुन सक्ने विवादले आसन्न निर्वाचनमा असर पर्ने भएकाले मन्त्रिपरिषद् विस्तारका लागि केही दिन कुर्ने उनको भनाई थियो ।