राष्ट्रपति भण्डारीप्रति उपाध्यक्ष अर्यालको कडा टिप्पणी : ‘कसैको इशारामा चल्ने होइन नि !’

काठमाडौं । राष्ट्रिय सभाकी उपाध्यक्ष उर्मिला अर्यालले अहिलेको राष्ट्रपति एमालेको मात्र भएको आरोप लगाएका छन् । बिहीबार पत्रकारहरूसँगको भेटघाटमा उपाध्यक्ष अर्यालले राष्ट्रपति भण्डारीले नागरिकता विधेयक रोकेको स्मरण गर्दै यस्तो आरोप लगाएका हुन् ।

उनले कसैको इशारामा चलेर नागरिकता विधेयक रोकेकी बताएका छन् । उनले भने, ‘राष्ट्रपति कसैको इशारामा चल्ने होइन नि । राष्ट्रपति त देशको अभिभावक हो नि, पार्टीको लेभलभन्दा माथि उठ्न पर्‍यो नि, हुबहु रूपमा रहेको अध्यादेश ओके गर्ने त्यही कानुन बनेर जाँदाचाहिँ रिजेक्ट गर्ने, मेरो पनि लिगेसी कतै जोडिएको छ तर मैले राष्ट्रिय सभा उपाध्यक्षका रूपमा मर्यादा र सीमा नाघ्न त भएन नि । यस्तो हुँदै जाने हो भने हामीले ल्याएको व्यवस्था र परिवर्तनप्रति विश्वास गुम्न सक्छ ।’

राष्ट्रको अभिभावक कुनै दल विशेषको इशारामा चल्न नहुने उनको भनाई थियो । संवैधानिक अभिभावकको भूमिकामा नरही नागरिकता विधेयक रोकेको उपाध्यक्ष अर्यालले बताए । उही व्यहोराको नागरिकतासम्बन्धी अध्यादेश पारित गर्ने राष्ट्रपतिले नागरिकता विधेयक रोक्नुको कुनै औचित्य पुष्टि नभएको अर्यालको भनाइ थियो । उनले राष्ट्रियसभाको उपाध्यक्ष रहँदा आफ्नो भूमिका सन्तुलित हुन नसके सजग गराउन आग्रह गरिन् ।