राष्ट्रपति निर्वाचनको नमुना मतपत्र सार्वजनिक, यस्तो छ नमूना !

काठमाडौं । निर्वाचन आयोगले राष्ट्रपति निर्वाचनको निम्ति नमूना मतपत्र तयार गरेको छ । संघीय र प्रदेश सांसदका लागि रातो र हरियो गरी दुईथरी को मतपत्र तयार गरेको हो ।

रातो मतपत्र संघीय संसदका प्रतिनिधिसभा र राष्ट्रियसभाका सदस्यलाई दिइने छ भने हरियो मतपत्र प्रदेश सभाका सदस्यहरुको निम्ति प्रयोग गर्नका लागि निर्माण गरिएको छ । दुवै मतपत्रमा उम्मेदवारको तस्बिर र नाम राखिएको छ । राष्ट्रपति र उपराष्ट्रपतिको निर्वाचनमा संघीय संसदअन्तर्गत प्रतिनिधि सभा र राष्ट्रिय सभाका सांसद तथा सात वटै प्रदेश सभाका सांसद मतदाता हुन्छन् ।

संघीय सांसदहरुको मतभार ७९ अंक र प्रदेश सभाका सांसदको मतभार ४८ तोकिएको छ । राष्ट्रपति चयनका लागि हुने यही फागुन २५ गते बानेश्वरस्थित अन्तर्राष्ट्रिय केन्द्रमा मतदान हुँदैछ । राष्ट्रपतिमा नेपाली कांग्रेसका तर्फबाट रामचन्द्र पौडेल र नेकपा एमालेबाट सुवासचन्द्र नेम्वाङ प्रतिस्पर्धामा छन् ।