‘पौडेल राष्ट्रपति भएपछि संविधानको रक्षकको भूमिका निर्वाह हुन्छ’ : सभापति देउवा

काठमाडौं । नेपाली कांग्रेसका सभापति शेरबहादुर देउवाले रामचन्द्र पौडेल राष्ट्रपति भएपछि संविधानको रक्षकको भूमिका निर्वाह गर्ने बताएका छन् । बिहीबार काठमाडौंमा आठ दलले आयोजना गरेको संघीय संसद् सदस्यहरूको अभिमुखीकरण कार्यक्रमलाई सम्बोधन गर्दै विगतमा राष्ट्रपतिबाट संविधानको रक्षकको भूमिका निर्वाह हुन नसकेको काम पौडेल राष्ट्रपति भएपछि संविधान विरोधी काम नहुने बताएका हुन् ।

उनले भने, ‘प्रजातन्त्र, लोकतन्त्र र अहिलेको संविधानको रक्षाका लागि रामचन्द्र पौडेलले भूमिका खेल्नुहुनेछ भन्नेमा म पूर्ण विश्वस्त छु । विगतमा हामीले राष्ट्रपतिको विषयमा निकै नमिठो अनुभव सँगाल्यौं । तर अब रामचन्द्रजीलाई राष्ट्रपति बनाएपछि त्यस्तो जोखिम रहँदैन । हामी धेरै पुराना साथी हौं। मलाई पनि उहाँका बारेमा सोच्दा खटपट भइरहन्थ्यो । अत्यन्तै महत्वपूर्ण घडीमा महत्वपूर्ण पदमा उहाँलाई अघि सारेका छौं ।’

उनले राष्ट्रपतिका लागि पौडेल सबैभन्दा उपयुक्त उम्मेदवार भएको धारणा राखेका थिए । पौडेललाई पार्टी र शेरबहादुरले कहिल्यै केही दिएन भन्ने परेको उनको भनाई थियो ।