‘संविधानको संरक्षक र एकताको प्रतीककारूपमा काम गर्ने राष्ट्रपतिमा मेरो उम्मेदवारी हो’ : नेम्वाङ

काठमाडौं । राष्ट्रपति पदमा उम्मेदवारी दिएका नेकपा एमालेका नेता सुवासचन्द्र नेम्वाङले आफू राष्ट्रपतिमा विजयी भएको अवस्थामा संविधान र कानुनबमोजिम चल्दै देशको अभिभावक, संविधानको संरक्षक र एकताको प्रतीकका रूपमा काम गर्ने प्रतिबद्धता व्यक्त गरेका छन् । राष्ट्रपतिले सरकार र देशलाई सहयोग गर्न सक्ने ठाउँ भएको भन्दै त्यसअनुसार आफू क्रियाशील बन्ने प्रतिबद्धता व्यक्त गरेका हुन् ।

संविधानको संरक्षण र पालना गर्न आफ्नो उम्मेदवारी उपयुक्त रहेको बताएका छन् । यस आधारमा जित हासिल गर्नेमा आफू विश्वस्त रहेको उनले भनाई थियो । उनले भने, ‘जनताले जनताका लागि पहिलोपटक संविधान’ भन्ने मान्यताका साथ निर्माण गरी जारी गर्‍यो । यो संविधानको संरक्षण र पालना गर्न मेरो उम्मेदवारी उपयुक्त छ, यही आधारमा मलाई विजय प्राप्त हुन्छ भन्ने विश्वास छ ।’

फागुन २५ गते हुने राष्ट्रपति निर्वाचनका लागि एमालेको तर्फबाट नेम्वाङले उम्मेदवार दर्ता गराएका छन् भने नेपाली कांग्रेस, माओवादी केन्द्रसहितका ८ दलको समर्थनमा कांग्रेस नेता रामचन्द्र पौडेलले उम्मेदवारी दर्ता गराएका छन् ।