शंकर पोखरेलको टिप्पणी : ‘माओवादी दक्षिणपन्थी अतिवाद हुँदै विसर्जन र पतको बाटोमा लागेको छ’

काठमाडौं । नेकपा एमालेका महासचिव शंकर पोखरेलले देश र जनताको पक्षमा उभिँदा एमालेमाथि चौतर्फी घेराबन्दी र आक्रमण भइरहेको बताएका छन् । २४ औं यदु गौतम स्मृति दिवसका अवसरमा आइतवार काठमाडौमा आयोजित कार्यक्रममा महासचिव पोखरेलले यस्तो बताएका हुन् ।

उनले माओवादीले गरेको जनयुद्धको उद्देश्य एकातिर र उसले लिएको बाटो अर्कोतिर भएको भन्दै माओवादी दक्षिणपन्थी अतिवाद हुँदै विसर्जन र पतनको बाटोमा लागेको बताएका छन् । उनले भने, ‘माओवादी कांग्रेसलाई बलियो र एमालेलाई कमजोर बनाउने काममा लाग्यो हिजोको चुनावमा, यदु गौतमको हत्या उग्रवामपन्थी अतिवादको नमुना हो । माओवादीभित्रको यो उग्रवामपन्थी अतिवाद दक्षिपन्थी विर्सजर्नवाद र आत्मसपर्णबादमा विर्सन हुन्छ । आज माओवादीलाई हेर्ने हो भने दक्षिणपन्थी अवसरवादको चरम नमुनाका रुपमा पतनमुखी यात्राका रुपमा अघि बढिरहेको छ ।’

पाँच दलीय गठबन्धनलाई जनताले अस्वीकार गरेपछि मुलुक बचाउन आफूहरूले माओवादी केन्द्रका अध्यक्ष पुष्पकमल दाहाल प्रचण्डलाई बनाउन बाध्य भएको बताएका छन् । उनले भने, ‘जनादेशले एमालेले नेतृत्व दाबी गर्ने प्रकृतिको छैन भनेका थियौँ । तर, पाँच दलीय गठबन्धन पनि असफल भइसकेपछि त्यसबाट मुलुकलाई जोगाउन आवश्यक छ भनेर नै हामीले माओवादी केन्द्रसँग एकता र सहकार्यको पहल गर्‍यौँ र प्रचण्डलाई प्रधानमन्त्री बनायौँ । देशमा आर्थिक संकट बढेको बेलामा नयाँ सरकार बनेपछि केही आसाको सञ्चार पनि भयो ।’

अहिले प्रचण्ड जसकाविरुद्ध जनयुद्ध गरेर हिँडेको थियो उसैलाई राष्ट्रपति बनाउन गठबन्धन भत्काएर हिँडेको टिप्पणी गरे । माओवादीले आन्दोलनको एजेन्डा बिर्सेर स्वार्थ केन्द्रित भएर गन्तव्य बिर्सेर कांग्रेसको राष्ट्रपति बनाउनेतिर गएको टिप्पणी गरे । उनले सत्तामा रहेका दलहरुको कार्यशैली र व्यवहारका कारण मुलुक संकटतर्फ धकेलिएकाले परिवर्तन पक्षधर शक्तिहरु धुर्वीकृत हुन जरुरी रहेको उनको भनाई रहेको छ ।