‘माओवादीहरू एकठाउँमा उभिएर लड्यौं भने आन्दोलन अमर र विजयी हुनसक्छ’ : प्रधानमन्त्री दाहाल

काठमाडौं । प्रधानमन्त्री पुष्पकमल दाहाल प्रचण्डले माओवादी शक्तिहरू एकताबद्ध हुँदा जवर्जस्त प्रभाव हुने बुझेर नै प्रतिक्रियावादीहरुले विभिन्न भ्रम छरेर घेरा हाल्ने षड्यन्त्र भइरहेको बताएका छन् । काठमाडौंमा आयोजित आइतबार शहीद तथा बेपत्ता परिवारको कार्यक्रममा उनले एकचोटी माओवादीहरू एकै ठाउँमा जम्मा भएर लाखौँ जनता सडकमा उतार्ने हो भने प्रतिक्रियावादी शक्तिहरू धेरै कमजोर हुने बताएका हुन् ।

उनले भने, हामी माओवादी आन्दोलनका सबै धारका प्रतिनिधि उपस्थित भएका छौं । यसले शक्तिशाली सन्देश दिन्छ । त्यसको महत्त्व दुरगामी र अर्थपूर्ण छ । हिजो हामीले जनयुद्धको अन्तिम समयमै पनि देखेकै कुरा हो । त्यसकारण अहिले एकताबद्ध हुनुपर्छ भन्ने आवश्यकता बोध गरिएको छ । यो एउटा शक्ति हो भन्ने ठान्छु र सबै साथीहरूलाई यो विषयमा गम्भीरतापूर्वक विचार गर्न आग्रह गर्न चाहन्छु । एकचोटी माओवादीहरू एकै ठाउँमा जम्मा भएर लाखौँ जनता सडकमा उतार्ने हो भने प्रतिक्रियावादी शक्तिहरू धेरै कमजोर छन् । घेराबन्दीका विरुद्ध लडिरहेका सबै शक्तिहरु एकठाउँमा उभिएर लड्यौं भने आन्दोलन अमर र विजयी हुनसक्छ ।’

उनले नेपाल समाजवादी पार्टीका अध्यक्ष बाबुराम भट्टराई, नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ लगायत अरू नेताहरूमाझ प्रचण्डले फेरि एकताबद्ध हुन अपिल गरेका हुन् । प्रचण्डले आफू राष्ट्रिय अन्तर्राष्ट्रिय घेराबन्दीविरुद्ध लडिरहेको बताएका छन् ।