सर्वोच्चलाई सभामुख घिमिरेको जवाफ : ‘संसद्‌मा कुनै दलले जाहेर गरेको मत सधैँ रहँदैन’

काठमाडौं । सभामुख देवराज घिमिरेले विपक्षी दलको नेताको विषय संसदको विशेषाधिकार भएको बताएका छन् । प्रमुख विपक्षी दलको नेताका सन्दर्भमा परेको रिटको सर्वोच्च अदालतमा पठाइएको जवाफमा उनले प्रमुख विपक्षी दलका नेताबारे उठेको प्रश्नको निरुपण गर्ने आफुहरु सक्षम रहेको बताउदै यस्तो बताएका हुन् ।

सभामुख घिमिरेले कुनै विषय र सन्दर्भमा जाहेर गरेको मत सँधै त्यही अवस्थामा नरहने जिकिर गरेका छन् । परिस्थितिका आधारमा र संसदको विशेषाधिकार भएको आधारमा पनि प्रमुख विपक्षी दलको नेताको विवाद सम्बन्धी रिटको औचित्य सकिएको सभामुख घिमिरेको जिकिर छ ।

अधिवक्ता विमलप्रसाद पोखरेलले गत माघ २४ गते नेपाली कांग्रेस संसदीय दलका नेता शेरबहादुर देउवालाई विपक्षी दलको नेता नबनाउन माग गर्दै सर्वोच्चमा रिट दिएका थिए । रिटमा कांग्रेस सभापति देउवाका साथै संघीय संसद् सचिवालय, सभामुख, संवैधानिक परिषद् र कांग्रेस संसदीय दलको कार्यालयलाई विपक्षी बनाइएको थियो ।

रिटमाथि सुनुवाई गर्दै सर्वोच्च अदालतले गत माघ २५ गते विपक्षीका नाममा कारण देखाउ आदेश जारी गरेको थियो ।