अध्यक्ष तिमिल्सिनाको टिप्पणी- ‘ढंग पुर्‍याएर संसद्‍ चलाउन नसक्ने अनि कागजलाई दोष दिएर उम्किन खोज्ने

काठमाडौं । राष्ट्रिय सभा अध्यक्ष गणेशप्रसाद तिमिल्सिनाले दलहरु आफू ठीक ढंगले नचल्ने तर दोष संविधान, कानुन र व्यवस्थालाई थोपरेर उम्कन नमिल्ने बताएका छन् । बुधबार पारिवारिक निजी वन संघ नेपालको ९ औं स्थापना दिवसको अवसरमा आयोजित कार्यक्रमलाई सम्बोधन गर्दै संविधान प्रयोगको गलत अभ्यासले संसद्‍ र सरकारले प्रभावकारी काम गर्न नसकेको बताएका हुन् ।

अध्यक्ष तिमिल्सिनाले भने, ‘संसद्‍ विघटन गर्ने कुरा दुनियाँमा जहाँ पनि जनप्रतिनिधिमुलक संस्था ठीकै ढंगले जाँदा कहीँ केही भयो भने सरकारले संसद्‍ विघटन गर्ने दुनियाँको जहाँको पनि अभ्यास हो । नेपालमा त्यो भइरहेको थियो । संविधान बनाउँदा के भयो भने यो नेपालमा पटकपटक विघटन भयो भनेर विघटन नै नगर्ने बनाउँ भनेर लेख्दा अहिले लफडा भइरहेको छ । आफूले ढंग पुर्‍याएर चलाउन नसक्ने अनि कागजतमा दोष दिएर कहीँ चल्छ । अहिले विघटन नगर्ने कुरा सबैभन्दा ठूलो क्रान्तिकारी, परिवर्तनगामी हुने भनेको छ । संविधानले त्यही भनेपछि त त्यही भन्नुपर्छ ।’

अध्यक्ष तिमिल्सिनाले सरकार सञ्चालन गर्नेहरुले ढंग पुर्‍याएर संसद्‍ चलाउन नसक्ने तर कागजलाई दोष दिएर उम्किन खाजेको आरोप लगाए । उनले सरकारले केही गर्न नसक्ने अवस्था सिर्जना हुँदा संसद विघटन गरी जनतामा जाने कुरालाई राजनीतिक दलहरुले नै अन्देखा गर्ने गरेको गुनासो गरे ।

सरकार अप्ठेरोमा पर्दा संसद्‍ विघटन गर्ने कुरा संसारभरको अभ्यास भएकाले यसलाई नौलो मान्नु नपर्ने उनले बताएका छन् । नेपालमा विगतमा पटकपटक संविधान विघटन भएकाले संविधानमै विघटन नै नगर्ने कुरा उल्लेख हुँदा संसदबारे अहिले विरोधाभाष भइरहेको उनको भनाइ थियो ।