माओवादी घटकको बैठकद्धारा संक्रमणकालीन न्याय टुंग्याउन सामूहिक दबाबका कार्यक्रम घोषणा

काठमाडौं । माओवादी घटकका पार्टीहरुले शान्ति प्रक्रियालाई छिटोभन्दा छिटो टुंग्याउने र शान्ति प्रकियाका पक्षमा निरन्तर अभियान जारी राख्ने भएका छन् । शुक्रबार बिहान प्रधानमन्त्रीको सरकारी निवास बालुवाटारमा बसेको माओवादी धारका नेताहरूको बैठकले शान्ति प्रक्रियालाई स्थापित गर्ने प्रक्रियाहरु अघि बढाउन संयुक्त रुपमा अन्तरक्रियाका कार्यक्रमहरु गर्ने निर्णय गरेको हो ।

फागुन २८ गते आइतबार संयुक्त पत्रकार सम्मेलन गरी पछिल्ला घटनाक्रमको सामूहिकरूपमा खण्डन गर्ने भएको छ । नेकपा माओवादी केन्द्रका महासचिव देवप्रसाद गुरुङका अनुसार बैठकले शान्ति प्रक्रियालाई स्थापित गर्ने प्रक्रिया अघि बढाउन संयुक्त अपिल प्रकाशन गर्ने, संयुक्त पत्रकार सम्मेलन गर्ने र फागुन ३० गते नागरिक समाजसँग शान्ति प्रक्रियाको बारेमा अन्तरक्रिया गर्ने निर्णय गरेको हो ।

महासचिव गुरुङले पछिल्लो समय शान्ति प्रक्रियाको उल्लंघन गर्ने प्रवृत्ति देखिएकोप्रति आपत्ति जनाएका छन् । प्रधानमन्त्री पुष्पकमल दाहालविरुद्ध दर्ता भएको रिट अदालतको कानुनी प्रक्रिया अनुसार अघि बढ्ने उनले बताए । यस्तै, महासचिव गुरुङले उपराष्ट्रपतिमा लैंगिक रुपले फरक र सामुदायिक फरक हुनुपर्ने आफ्नो पार्टीको धारणा रहेको उनको भनाई थियो ।