विश्व प्रसिद्ध ‘सिलिकन भ्याली बैंक’ स्थापनाको ४० वर्षमा कसरी भयो बन्द ?

काठमाडौं । संयुक्त राज्य अमेरिकाको १६औँ ठुलो सिलिकन भ्याली बैंक बन्द भएको छ । अमेरिकामा निक्षेप सुरक्षणको जिम्मा पाएको फेडरल डिपोजिट इन्स्योरेन्स कर्पोरेसनले उक्त बैंक बन्द गर्ने निर्णय गरे पश्चात बैंक बन्द भएको हो ।

अन्तर्राष्ट्रिय सञ्चार माध्यमहरूको रिपोर्टका अनुसार क्रिप्टोमा अत्याधिक लगानीका कारण तरलता व्यवस्थापन गर्न नसक्दा अमेरिकाको सिलिकन भ्याली बन्द भएको हो । सिलिकन बैंक बन्द हुनुको मुख्य कारण अल्पकालीन निक्षेप धेरै हुनु र तरलता संकट अत्याधिक हुनु रहेको विश्लेषकहरु बताउँछन् । घाटा पूर्तिका लागि यस बैंकले गत बुधबार मात्र ठूलो हिस्सामा बन्ड सेयर बेचेको र करिब २.२५ बिलियन बराबरको नयाँ सेयर बेच्ने घोषणा गरेको थियो ।

सिलिकन भ्यालीलाई अब संघीय निक्षेप बीमा निगम (FDIC) ले अधिग्रहण गर्ने जनाइएको छ । सबै बीमित निक्षेपकर्ताहरूले आफ्नो निक्षेप निकाल्ने स्वतन्त्रता प्रदान गर्नका निमित्त १३ मार्चमा बैंक खुला गरिने बताइएको छ ।