पौडेल राष्ट्रपति बनेपछि तनहुँ १ मा उपनिर्वाचन, को-को छन् कांग्रेसबाट दाबेदार ?

काठमाडौं । तनहुँ क्षेत्र नम्बर १ को उपचुनावको मिति घोषणा नभए पनि नेपाली कांग्रेसबाट तीनजनाले आफ्नो उम्मेदवारी दाबी पेश गरेका छन् । रामचन्द्र पौडेल राष्ट्रपति निर्वाचित भएपछि रिक्त बनेको तनहुँ क्षेत्र नम्बर १ को उपचुनावका लागि केन्द्रीय सदस्य गोविन्द भट्टराई, नेता रामचन्द्र पोखरेल, दिपक भट्टराईले दाबी पेश गरेका हुन् ।

रामचन्द्र राष्ट्रपति उम्मेदवार बनेलगत्तै केन्द्रीय सदस्य तथा नेविसंघका पूर्व अध्यक्ष सहित रहेका भट्टराईले सभापति शेरवहादुर देउवालाई भेटेर आफूमाथि न्याय हुनुपर्ने बताएका थिए । उनले आफूलाई सभापतिले उपचुनावको तयारीमा लाग्न भनिसकेको बताएका छन् । सोही क्षेत्रबाट कांग्रेसका पूराना नेता पोखरेलले पनि उम्मेदवार बन्नका लागि सार्वजनिक रुपमै लबिङ गरेका छन् ।

त्यस्तै, कांग्रेसबाट तनहुँ १ मा युवा नेता दिपक भट्टराईले पनि दावी गरेका छन् । त्रिचन्द्र क्याम्पसको स्ववियु सभापति र नेविसंघको महामन्त्री भइसकेका भट्टराई हाल महाधिवेशन प्रतिनिधि छन् ।