प्रधानमन्त्रीसँग प्रदेश प्रमुखहरूको सामूहिक भेटवार्ता, संघीयता कार्यान्वयन गर्नेबारे छलफल

काठमाडौं । प्रधानमन्त्री पुष्पकमल दाहाल र प्रदेश प्रमुखहरूबीच सामूहिक भेटवार्ता भएको छ । प्रधानमन्त्री निवास बालुवाटारमा बुधबार प्रधानमन्त्री र प्रदेश प्रमुखहरूबीच छलफल भएको हो ।

भेटमा कोशी प्रदेशका प्रमुख परशुराम खापुङ, मधेस प्रदेश प्रमुख हरिशंकर मिश्र, बागमती प्रदेशका प्रमुख यादवचन्द्र शर्मा, गण्डकी प्रदेशका प्रमुख पृथ्वीमान गुरुङ, लुम्बिनी प्रदेशका प्रमुख अमिक शेरचन र कर्णाली प्रदेश प्रमुख तिलक परियार सहभागी थिए । सुदूरपश्चिम प्रदेशका प्रमुख देवराज जोशी भने सहभागी थिएनन् ।

भेटवार्तामा संघीयतालाई कसरी प्रभावकारी रूपमा कार्यान्वयन गर्ने भन्ने विषयमा छलफल भएको थियो । पछिल्लो समय संघीयताको खासगरी प्रदेश संरचनाको आलोचना भएको विषयमा पनि प्रधानमन्त्री दाहाल र प्रदेश प्रमुखहरूबीच छलफल भएको छ । प्रधानमन्त्रीसँगको भेटमा प्रदेश प्रमुखहरूले मर्यादाक्रमको विषय पनि उठाएका थिए । हाल प्रदेश प्रमुखहरूको मर्यादाक्रम सातौं नम्बर आफ्नो प्रदेशमा छ ।

आफ्नो प्रदेशभन्दा बाहिर गएपछि भने आठौं नम्बरमा मर्यादाक्रम झर्ने गरेको छ । त्यसैले, यो मर्यादाक्रम सच्याउनुपर्ने सुझाव प्रदेश प्रमुखहरूले राखेका थिए । संघीयताको प्रभावकारी कार्यान्वयन, यसमा देखिएका समस्या र समाधानका उपायबारे प्रधानमन्त्रीले सबै प्रदेश प्रमुख र मुख्यमन्त्रीहरूलाई बोलाएर छलफल गर्ने बताएका छन् ।