प्रचण्डलाई भीम रावलको प्रश्न : जनताको मुख थुन्ने कुवुद्धि कसले सिकायो ?

काठमाडौं । नेकपा एमालेका नेता भीम रावलले प्रधानमन्त्री पुष्पकमल दाहाल प्रचण्डमाथि प्रश्न उठाएका छन् । प्रधानमन्त्री पुष्पकमल दाहाल प्रचण्ड उपस्थित बानेश्वरको एक कार्यक्रममा आक्रोशित युवाले नाराबाजी गरे पछि प्रहरीले मुख थुनेको घटनालाई लिएर भीम रावलले प्रचण्डमाथि प्रश्न उठाएका हुन् ।

बुधबार नेता रावलले सामाजिक सन्जालमार्फत भनेका छन्, ‘जनताको मुख थुन्ने तथा देश, विदेशलाई हेर्ने आफ्नै विवेकको आँखा थुन्ने तर दलाल पूँजिपति र वाह्य हस्तक्षेपकारीहरूलाई देश, सँस्कृति र राज्यमा दाईँ गर्न खुला छोड्ने१ यस्तो कुबुध्दि कसले सिकायो ?’

रावलले जनताको मुख थुन्ने तर दलाल पूँजीपतिलाई खुला छोडेकोमा आपत्ति जनाएका हुन् । मंगलवार नयाँ बानेश्वरमा प्रधानमन्त्री सहभागी हुन पुगेको कार्यक्रममा केही युवाले ब्याजदर कम गर्न माग गर्दै विरोध जनाएका थिए । लगत्तै उनीहरुलाई प्रहरीले नियन्त्रणमा लिएका थिए ।