अफगानिस्तानमा ६.५ म्याग्निच्युडको भूकम्प, १३ जनाको मृत्यु र दर्जनौँ घाइते

काठमाडौं । अफगानिस्तान र पाकिस्तानको सीमा नजिक केन्द्रविन्दु भएर भूकम्प गएको छ । मंगलबार राति करिब साढे १० बजेतिर अफगानिस्तानको सहर जुर्म भन्दा ४० किलोमिटर दक्षिणपूर्वमा पाकिस्तान र ताजकिस्तानको सीमा नजिक केन्द्रविन्दु भएर ६.५ म्याग्निच्युडको भूकम्प गएको हो ।

भूकम्पमा परी दर्जनौँ मासिसहरू घाइते भएको अन्तर्राष्ट्रिय सञ्चार माध्यमले जनाएको छ । उत्तरपश्चिमी पाकिस्तानमा भूकम्पबाट कम्तिमा ९ जनाको ज्यान गएको र ४४ जना घाइते भएको सरकारी अधिकारीहरूले बताएका छन् । अफगानिस्तानमा कम्तिमा चारजनाको मृत्यु भएको र ५० जना घाइते भएको स्वास्थ्य मन्त्रालयका अधिकारीले बताएको छ ।

भूकम्पको धक्का भने भारत, पाकिस्तान, उज्वेकिस्तान, ताजिकिस्तान, काजाकिस्तान, किर्गिजस्तान, अफगानिस्तान र तुर्कमेनिस्तानका करिब २८ करोड भन्दा बढी मानिसले महसुस गरेको युरोपेली भूमध्य भूगर्भ केन्द्रले जनाएको छ । पाकिस्तानमा १० वर्षीया बालिका र २४ वर्षीय पुरुषसहित ९ जनाको मृत्यु भएको र २० भन्दा बढी घरमा क्षति भएको उद्धार सेवाका प्रवक्ता बिलाल फैजीले बताएका छन् ।