प्रचण्डविरुद्ध नाराबाजी गर्ने तिन जनालाई प्रहरीले चलायो मुद्दा

काठमाडौं । प्रधानमन्त्री पुष्पकमल दाहाल प्रचण्डविरुद्ध नाराबाजी गर्ने युवाहरूलाई ३ युवा विरुद्ध प्रहरीले मुद्दा चलाएको छ । ५८औं अन्तर्राष्ट्रिय जातीय भेदभाव उन्मूलन दिवसको अवसरमा आयोजना गरिएको समारोहमा जाँदै गर्दा प्रधानमन्त्री पुष्पकमल दाहालविरुद्ध नाराबाजी गर्ने सोम शर्मा, उद्धव बस्नेत र विप्लव खड्काविरुद्ध काठमाडौं जिल्ला अदालतबाट तीन दिनको म्याद थप गरी अभद्र व्यवहारअन्तर्गत मुद्दा चलाइएको हो ।

प्रहरीले प्रधानमन्त्री संलग्न कार्यक्रममा बाधा पुर्‍याउन खोजेको भन्दै तीन जना युवालाई पक्राउ गरिएको र अभद्र व्यवहारमा मुद्दा चलाइएको काठमाण्डू प्रहरीका प्रवक्ता सीताराम रिजालले बताएका छन् । प्रहरीले प्रचण्डविरुद्ध नाराबाजी गर्नेहरूको मुख थुन्दै गरेको भिडिओ र तस्बिर सामाजिक सञ्जालमा मानिसहरूले शेअर गर्दै ‘बोल्न पनि नपाइने हो ? भनिरहेका छन् । यो घटनाबारे बुधवार संसद्‌मा पनि प्रश्न उठेको छ ।

प्रधानमन्त्रीविरुद्ध नाराबाजी गरिरहेका उनीहरूलाई प्रहरीले मुख बन्द गर्दै लछारपछार पारेर प्रहरी भ्यानमा हालेको थियो । उनीहरूले ‘आतङ्ककारी प्रचण्ड मुर्दावाद’ जस्ता नारा लगाएका थिए । हाल उनीहरू प्रहरी वृत्त बानेश्वरको हिरासतमा छन् ।