क्यानले बढायो क्रिकेट प्रशिक्षकको मोन्टी देसाइको तलब, मासिक १० हजार डलर पाउने

काठमाडौं । नेपाल क्रिकेट संघले क्रिकेट प्रशिक्षकको तलब बढाएको छ । संघले नेपाली क्रिकेट टिमलाई राम्रो नतिजा दिलाएका भारतीय प्रशिक्षक मोन्टी देसाइको मासिक तलबमा २० प्रतिशतले बढाएको हो ।

प्रशिक्षक नियुक्त भएको दुई महिना नपुग्दै देसाईको तलब आउँदो अप्रिल १ बाट लागूहुने गरी बढाइएको छ । यसअघि मासिक १० हजार डलर पाउने सम्झौता रहेकोमा अब उनले मासिक १२ हजार डलर करिब १६ लाख रुपैयाँ पाउने छन् । क्यानका अध्यक्ष चतुर बहादुर चन्दले यसअघि सम्झौता गर्दा नै नेपालले एक दिवसीय मान्यता जोगाउन सफल भएको खण्डमा तलब बढाउने समझदारी रहेको बताए ।

गत माघ २३ गते देसाइलाई क्रिकेट संघले प्रमुख प्रशिक्षकमा नियुक्ति दिएको थियो । औपचारिक नियुक्ति पाउनुभन्दा केही दिनअघिबाटै देसाइले नेपाली टिम सम्हालेका थिए । देसाइको प्रशिक्षणका नेपालले घरेलु मैदानमा २ वटा र यूएईमा एउटा एक दिवसीय शृङ्खला खेलेको छ । घरेलु मैदानमा भएका दुवै श्रृङ्खला नेपालले क्लीन स्वीप गर्न सफल भयो । यसैगरी यूएईमा भएका ४ म्याच मध्ये तीनवटा नेपालले जितेको थियो ।