प्रधानमन्त्रीलाई महामन्त्री थापाको आग्रह-‘एक सेकेन्डको कसरी प्रयोग गर्ने भनेर डराउनुस् तर नागरिकलाई नतर्साउनुस्’

काठमाडौं । नेपाली कांग्रेसका महामन्त्री गगन थापाले अहिले कुर्सीमा बसेको प्रधानमन्त्री डराए मात्रै जनतामा देखिएको निराशा कम गर्न सकिने बताएका छन् । सामुदायिक रेडियोको राष्ट्रिय सम्मेलनलाई सम्बोधन गर्दै उनले प्रधानमन्त्री अहिले एक्लै बस्न सक्ने अवस्था नरहेको र एक्लै बस्दा डराउनुपर्ने अवस्था आएको बताएका हुन् ।

उनले भने, ‘अहिले म साँच्चिकै डराएको छु । मैले प्रधानमन्त्रीलाई पटक पटक भन्ने गरेको छु । नागरिकलाई नतर्साउनुस् । प्रधानमन्त्री एक्लै बस्दा डराउनुपर्ने अवस्था आएको छ । एक्लै बिहान बेलुका एक्लै बस्दा खेरी । म आग्रह गर्न चाहन्छु कम्तीमा दिनमा आधा घण्टा समय निकाल्नुस् । भेटघाट बन्द गर्नुस् र एक पटक सोच्नुस् । आफूसँग भएको एक एक सेकेन्डको कसरी प्रयोग गर्ने भनेर डराउनुस् । कुर्सीमा बसेको प्रधानमन्त्री यति बेला डराउनुपर्छ । प्रधानमन्त्री डरायो भने मात्रै नागरिक डरबाट मुक्त हुने अवस्था आउँछ । प्रधानमन्त्रीले बायाँ हेर्‍यो भोट दायाँ हेर्‍यो भोट मसँग त १७२ भोट छ भनेर ढुक्क भएर बस्नुभयो भने टाउको टाउकोले मञ्च भरिन्छ तर, भुईँमा सुन्ने मान्छे बाँकी नरहन सक्छ ।’

महामन्त्री थापाले अहिलेजस्तो मानिसहरूमा निराशा आफूले अहिलेसम्म नदेखेको बताए । प्रधानमन्त्रीले अहिले आफ्नो वरिपरि भोट मात्रै हेरेर बसे पछि आफ्नो कुरा सुन्ने बाँकी कोही नरहने उनको भनाइ रहेको छ ।

थापाले सामाजिक सञ्जालबाट हुने ‘फेक सूचना’ र गलत भाष्य निर्माणलाई रोक्न सरकारलाई आमसञ्चार माध्यमले सघाउनुपर्ने बताएका छन् । उनले फेक न्युजको प्रवाह रोक्न र समुदायलाई त्यस्तो गलत सूचनाबाट जोगाउन सामुदायिक रेडियोको भूमिका महत्त्वपूर्ण हुने बताए ।