अध्यक्ष सीके राउत भन्छन् : ‘बारा २ मा फिरंगी उम्मेदवारको गुन्जायस छैन’

बारा । जनमत पार्टीका अध्यक्ष सीके राउतले जनता समाजवादी पार्टी जसपा नेपालका अध्यक्ष यादव चोर बाटोबाट संसद्मा प्रवेश गर्न खोजेको आरोप लगाएका छन् । पार्टी प्रवेश कार्यक्रममा आएका राउतले यादवमाथि खनिएर ‘फिरङ्गी, बाहिरिया’लगायतका आरोप लगाउँदै यसपटक पनि चुनाव हराउने दाबी गरेका हुन् ।

उनले भने, माताको यो दरवारमा स्वाभिमानी वीर योद्धाहरूको यो भूमिमा कुनै बाहिरी फिरंगी उम्मेदवार चण्डमुण्डको कुनै गुन्जायस छैन । यहाँ हरेक हालतमा जनमत पार्टी हौरन छाप नै वीजयी हुनेछ ।’

गत मङ्सिर ४ गते भएको निर्वाचनमा सप्तरी–२ मा यादव राउतसँग पराजित भएका थिए । त्यसैले बारा–२ का सांसद रामसहाय यादवलाई उपराष्ट्रपति बनाएर यादव सो क्षेत्रबाट संसद्मा ‘कम्ब्याक’को तयारी लागेका छन् । तर राउतले बारामा पनि यादवका विरुद्धमा पार्टीले उम्मेदवारी दिने घोषणा गरेका छन् । यसैबीच उनले महागढीमाईको दर्शन गर्दै मिसन बारा २ को आरम्भसमेत गरेका छन् ।