यस्तो छ सांसद चन्द्र भण्डारीको पछिल्लो स्वास्थ्य अवस्था !

काठमाडौं । ग्यास लिक भइ आगलागीमा परी घाइते भएका नेपाली कांग्रेसका सांसद चन्द्र भण्डारीको स्वास्थ्यमा क्रमिक सुधार आएको छ । भारतको मुम्बईस्थित नेशनल बर्न्स सेन्टरमा उपचाररत सांसद भण्डारीको स्वास्थ्यमा क्रमिक रूपमा सुधार आएको र सामान्य आहार दिन सुरू गरिएको छ ।

यसका साथै अनुहारको छाला राम्रो हुँदै गएको, अपरेशन गर्न आवश्यक नभएको, स्वास्थ्यमा सुधार भइरहेको र कलमी छालाले राम्रोसँग काम गरिरहेको डा. सुनिल मनोहर केश्वानीले जनकारी दिए ।

उनले भने, ‘भण्डारीलाई सामान्य आहार प्रदान गरिएको छ भने सबै स्वास्थ्य प्यारामिटरहरू सामान्य छन् । संक्रमण नियन्त्रण गर्न अस्पताल प्रशासनले आगन्तुकहरूलाई कडाइका साथ निषेध गरेको छ । ग्राफ्ट गरेको छालाले राम्रोसंग काम गरेको छ तर पूर्ण निको हुन समय लाग्नेछ । अर्को १ हप्ता पछि सम्पूर्ण ग्राफ्ट गरिएको छालाको मुल्यांकन गरिने छ । आशा गरौ सवै राम्रो हुनेछ । आज पनि सपोर्ट विना केही समयका लागि बस्नु भयो । अरुको सहयोगमा उठेर आफै कुर्सीमा बस्नु भयो भने करिव ३ मिनेट जति हिड्नु पनि भयो ।’

बुद्धनगरस्थित निवासमा गत फागुन ३ गते ग्यास लिक भई आगलागी हुँदा सांसद भण्डारी घाइते भएका थिए । सुरूमा कीर्तिपुरस्थित अस्पतालमा उपचार गराएर उनलाई थप उपचारका लागि भारत लगिएको थियो । फागुन ४ गतेदेखि भारतको मुम्बईस्थित नेशनल बर्न सेन्टरमा भण्डारीको उपचार भइरहेको छ ।