पदम लिम्बूको परिवारलाई तीन लाख दिने कोशी प्रदेशको निर्णय

विराटनगर । पदम लिम्बू लाजेहाङको परिवारलाई प्रदेश सरकारले ३ लाख रूपैयाँ उपलब्ध गराउने निर्णय गरेको छ । मन्त्रिपरिषदको सोमबार बसेको बैठकले कोशी प्रदेश नामकरणको विरोधमा भएको प्रदर्शनमा घाइते भई मृत्यु भएका लाजेहाङको परिवारलाई ३ लाख रूपैयाँ उपलब्ध गराउने निर्णय गरेको हो ।

प्रदेश सरकारले घटनाको सम्बन्धमा संघीय सरकारद्वारा गठित छानबिन समितिलाई सहजीकरण गर्ने निर्णय गरेको छ । बैठकले प्रदेश प्रशिक्षण प्रतिष्ठान, कलबल्गुडीको निर्देशकमा प्रदेश सचिव कृष्ण सापकोटालाई जिम्मेवारी दिएको छ । बैठकले प्रदेश वातावरण संरक्षण ऐन २०७६ र प्रदेश वन ऐन २०७७ विधेयक प्रदेश सभामा पेश गर्न स्वीकृति प्रदान गर्ने निर्णय गरेको छ ।

कोशी खारेजीसँगै पहिचानका आधारमा नाम राखिनुपर्ने मागसहित गत चैत ५ गते भएको विराटनगरको आन्दोलनका क्रममा लिम्बू घाइते भएका थिए । त्यसपछि बीपी कोइराला मेमोरियल अस्पतालमा उपचाररत लिम्बूको शुक्रबार बिहान निधन भएको थियो ।