‘अध्यक्ष माधवकुमार नेपाल लाज नभएको मान्छे हो’ : केपी ओली

काठमाडौं । नेकपा एमालेका अध्यक्ष केपी शर्मा ओलीले कांग्रेसले पहिलेदेखि नै बेइमानी गर्नसक्छ भन्ने कुरा आफूले सानैदेखि थाहा पाएको बताएका छन् । सोमबार मिसन ग्रास रुटअन्तर्गत गुल्मीमा पुगेका ओलीले यस्तो बताएका हुन् । उनले संविधान बनाएपछि एमालेले सरकारको नेतृत्व गर्ने सहमति भए पनि कांग्रेसले नमानेको बताए ।

उनले भने, ‘म राजनीतिमा लागेको ५८ वर्ष भयो । सानैदेखि कांग्रेस बदमास छ, फटाहा छ भन्ने कुरा थाहा पाएको हो । हामीले अरु पनि विकल्प तयार गरेको भएकाले त्यसबेला कांग्रेस र सुशील कोइरालालाई पराजित गर्न सक्यौं र सरकार बनायौं ।’ नेकपा एकीकृत समाजवादीका अध्यक्ष माधवकुमार नेपाल लाज नभएको मान्छे भएको उनले टिप्पणी गरेका छन् ।

ओलीले भने, ‘नाम एकीकृत समाजवादी राखेका छन् । पार्टी चैं फाटोवादी पूँजीवादको पछाडि लखुरलुखुर हिँड्ने । पूँजीवादका पछाडि हिँडेर नाम चैं समाजवादी राखेका छन् । हाम्रा गाउँमा धनबहादुर भन्ने गरिब मान्छे थिए । एउटा बलबहादुर भन्ने थिए फुके डन । नामले हुँदैन रहेछ । उनले माधव नेपालले फाटोवादी पूँजीवादी पार्टी खोलेको बताए ।