पशुपति मन्दिर परिसरमा प्लाष्टिक निषेध गर्ने कोषको निर्णय

काठमाडौं । पशुपतिनाथ मन्दिर परिसरमा प्लाष्टिकका कारण बढी फोहोर भएको भन्दै प्लाष्टिक निषेध गर्ने निर्णय गरेको छ । पशुपति क्षेत्र विकास कोषले बुधबार एक सूचना प्रकाशित गर्दै सो निर्णय गरेको जनाकारी गराएको हो ।

प्लाष्टिकजन्य सामग्रीका कारण पवित्र पाशुपत क्षेत्र बढी फोहोरयुक्त देखिएकाले प्लाष्टिकजन्य सामग्री यस क्षेत्रमा नल्याइदिन साथै स्वच्छ पशुपति सफा पशुपति अभियान सफल बनाउन हामी सबै जुटौं भन्ने अनुरोधसहित यो सूचना प्रकाशित गरिएको कोषले प्रकाशित गरेको सूचनामा भनिएको छ । संस्कृति पर्यटन तथा नागरिक उड्डयन मन्त्रालयले हरेक शनिबार पशुपति क्षेत्रमा सरसफाइ अभियान चलाइरहेको छ ।

यो अभियान तीन महिनासम्म निरन्तर चल्नेछ । शनिबार बिहान ८ बजेदेखि १० बजेसम्म चल्ने यस अभियानमा सहभागी हुन समेत कोषले सबैलाई अनुरोध गरेको छ ।