उपप्रधानमन्त्री श्रेष्ठलाई धर्ना बसेका मिटर व्याज पीडितको प्रश्न : ‘सरकारले अड्डा अदालत किन बनाएको ?’

काठमाडौं । उपप्रधानमन्त्री तथा भौतिक योजना मन्त्री नारायणकाजी श्रेष्ठ मिटर ब्याज पीडितहरुलाई भेट्न  माइतीघर पुगेका छन् ।  न्यायको माग गर्दै  माइतीघरमा धर्ना बसेका मिटर व्याज पीडितलाई भेट्न उपप्रधानमन्त्री श्रेष्ठ माइतीघर पुगेका हुन् । 

 उपप्रधानमन्त्री श्रेष्ठले पीडितहरुको साथमा रहेको बताउँदै सुरक्षाको ग्यारेन्टी आफूले दिने बताएका छन् । पीडितहरूको कुरा सुन्ने क्रममा एक सानी बालिकासँग मन्त्री श्रेष्ठको केही बेर रोचक सवाल जवाफ भएको थियो । त्यस क्रममा मिटर व्याज पीडित परिवारकी आमासँग काठमाडौं आएकी बालिकाको सवालमा  जबाफ दिदै श्रेष्ठले सुरक्षाको ग्यारेन्टी आफूले दिने बताएका हुन् ।  बालिकाले  खरो भएर  ‘हामीलाई सुरक्षा त दिनुपर्‍यो नि, मलाई पनि धाक धम्कीहरू दिन्छ । तर, पनि केही कारबाही गर्दैनन्’ भन्ने कुरा राखेकी थिइन् ।   
  
मन्त्रीका अगाडि आमा सुँक्कसुँक्क गर्दै रोइरहँदा बालिकाले भने खरो भएर आफ्नो कुरा राखिन् । उनले अड्डा अदालतबाट आफूहरूले न्याय नपाएको बताइन् । उनले सरकारले अड्डा अदालत किन बनाएको ? जस्ता प्रश्न उपप्रधानमन्त्री श्रेष्ठसँग गरेकी थिइन् ।