कांग्रेसले टुंग्यायो उपनिर्वाचनका लागि उम्मेदवार, तनहुँ १ मा भट्टराई र चितवन २ मा श्रेष्ठलाई बनाउने निर्णय

काठमाडौं । नेपाली कांग्रेसले उपनिर्वाचनका लागि उम्मेदवार टुंग्याएको छ । बिहीबार पार्टी कार्यालय सानेपामा बसेको कांग्रेस केन्द्रीय कार्यसम्पादन समितिको बैठकले तनहुँ र चितवनमा वैशाख १० गते हुने उपनिर्वाचनका लागि उम्मेदवार टुंग्याएको हो ।

कांग्रेसले तनहुँ १ मा केन्द्रीय सदस्य गोविन्द भट्टराई र चितवन २ मा जीतनारायण श्रेष्ठलाई उम्मेदवार बनाउने निर्णय गरेको छ । तनहुँ १ मा कांग्रेस सभापति शेरबहादुर देउवाले उपनिर्वाचनमा भट्टराईलाई उम्मेदवार बनाउने बचन यसअघि नै दिएका थिए । कांग्रेसको कार्यसम्पादन बैठकमा तनहुँ–१ मा भट्टराईलाई र चितवन २ मा श्रेष्ठलाई उम्मेदवार बनाउने सहमति जुटेको केन्द्रीय सदस्य अर्जुननरसिंह केसीले जानकारी दिएका छन् ।

बारा २ मा भने कांग्रेसले उम्मेदवार तय गरेको छैन । सो क्षेत्रमा जसपालाई सघाउने कांग्रेसको तयारी छ । तनहुँ १ बाट निर्वाचित रामचन्द्र पौडेल राष्ट्रपति र बारा २ बाट निर्वाचित रामसहायप्रसाद यादव उपराष्ट्रपति भएपछि सो क्षेत्रमा उपनिर्वाचन हुन लागेको हो । यस्तै रास्वपाका रवि लामिछाने नागरिकता विवादमा दोषी ठहर भएपछि चितवन २ मा पनि उपनिर्वाचन हुन लागेको हो । उपनिर्वाचनका लागि चैत २० मा मनोनयन दर्ता गर्ने कार्यक्रम छ ।