कांग्रेसले गर्यो बारा २ मा जसपालाई समर्थन गर्ने निर्णय

काठमाडौं । नेपाली कांग्रेसले बारा–२ मा जनता समाजवादी पार्टी जसपाका उम्मेदवारलाई समर्थन गर्ने निर्णय गरेको छ । आइतबार बसेको केन्द्रीय कार्यसम्पादन समिति बैठकले जसपाका अध्यक्ष उपेन्द्र यादवलाई समर्थन गर्ने निर्णय गरेको हो ।

बारा–२ मा सत्ता गठबन्धन सम्बद्ध जनमत पार्टी र लोसपाले पनि उम्मेदवारी दिने तयारी छ । तर कांग्रेसले जसपाको उम्मेदवारलाई समर्थन गर्ने निर्णय लिएको छ । त्यहाँ आगामी वैशाख १० गते हुने उपनिर्वाचनमा जसपाका उपेन्द्र यादवले उम्मेदवारी दिने तयारी गरेका छन् ।

कांग्रेसले चितवन २ मा पूर्व जिल्ला सभापति जितनारायण श्रेष्ठ र तनहुँ १ मा गोविन्द भट्टराईलाई उम्मेदवार बनाएको छ । यादवले यसअघि नै कांग्रेस सभापति शेरबहादुर देउवालाई धुम्बाराहीमा भेटेर बारा २ मा सहयोग गर्नुपर्ने माग गरेका थिए । देउवाले सहयोग गर्ने बचन दिएका थिए ।