बारा २ मा पुरुषोत्तम पौडेललाई उम्मेदवार बनाउने एमालेको निर्णय

काठमाडौं । नेकपा एमालेले बारा क्षेत्र नम्बर २ मा हुने उपनिर्वाचनका लागि पुरुषोत्तम पौडेललाई उम्मेदवार बनाउने भएको छ । पार्टी सचिवालय बैठकले पूर्व खेलकुद मन्त्रीसमेत रहेका पौडेललाई मनोनयन दर्ताको केही समय अघि मात्र उम्मेदवार बनाउने निर्णय गरेको हो ।

पौडेल एमाले भित्रको विवाद उत्कर्षमा पुग्दा माधव नेपाललाई साथ दिएका थिए । तर एमाले विभाजन भएको करिब एक महिनापछि उनले आफू एमालेमै रहने घोषणा गरेका थिए । गत मंसिर ४ को निर्वाचनमा बारा २ को निर्वाचनमा एमालेले जनता समाजवादी पार्टीलाई सघाएको थियो । जसपाबाट चुनाव जितेका रामसहाय प्रसाद यादव उपराष्ट्रपति बनेपछि रिक्त भएको स्थानमा पूर्ति गर्न आगामी बैशाख १० गते उपनिर्वाचन हुन लागेको हो ।

बारा २ मा कांग्रेस, माओवादी केन्द्रलगायतका सत्तारुढ दलहरूले जनता समाजवादी पार्टी जसपाका अध्यक्ष उपेन्द्र यादवलाई समर्थन गर्ने निर्णय गरिसकेका छन् । बारा २ सहित चितवन २ र तनहुँ १ मा २०८० बैशाख १० गते गते हुने उपनिर्वाचनका लागि सोमबार मनोनयन दर्ता गर्ने चुनावी कार्यतालिका छ ।