‘मैले केही लुकाएको र छिपाएको छैन तर मलाई तर्साउन मुद्दामाथि मुद्दा हालियो’ : रवि लामिछाने

काठमाडौं । राष्ट्रिय स्वतन्त्र पार्टीका सभापति रवि लामिछानेले आफ्नो बारेमा केही लुकाइ छिपाइ नगरेको बताएका छन् । वैशाख १० गते हुने उपनिर्वाचनमा उम्मेदवारी दर्तापछि घरदैलो कार्यक्रममा बोल्दै उनले नेपाली जनतादेखि राज्यलाई आफ्नो अवस्थाबारे इमानदारीपूर्वक बताएको दाबी गरेका हुन् ।

उनले भने, ‘अझै पनि भ्रममा पारेर यसलाई तर्साउन सकिन्छ कि सिध्याउन सकिन्छ कि भनेर मुद्दामाथि मुद्दा हालेको देखिएको छ । मलाई यो मुद्दाहरूसँग केही लिनु छैन । मैले नेपाली जनतादेखि राज्यलाई आफ्नो अवस्थाबारे इमानदारीपूर्वक बताएको छु । मैले केही लुकाएको र छिपाएको छैन । यसले अपराध गर्यो । यसले गरेको अपराधबाट यो मान्छे पीडित भयो भनेर एक जना मान्छे देखाइदिनुस् ।’

आफ्नो कारणबाट अहिलेसम्म एक जना मान्छे पनि पीडित नभएको उनको भनाई थियो । आफूलाई सिध्याउन र तर्साउन मुद्दामाथि मुद्दा हालिएको बताएका छन् । आफ्नो हालीमुहालीको लागि नभई असल मान्छेहरूका लागि पार्टी बनाइरहेको उनले बताएका हुन् ।