‘मोर्चा बनाएर सरकारको नेतृत्व गर्न अप्ठ्यारो छ’ : प्रधानमन्त्री प्रचण्ड

काठमाडौं । प्रधानमन्त्री पुष्पकमल दाहाल प्रचण्डले संघीयता र समानुपातिक समावेशिता मन नपराउनेहरूबाट संविधान विरोधी गतिविधि भइरहेको बताएका छन् । नेकपा माओवादी केन्द्रको सहकारी तथा गरीवी निवारण विभागले आयोजना गरेको सहकारीकर्मीको पहिलो भेलालाई सम्बोधन गर्दै अहिलेपनि संविधानलाई कमजोर बनाएर उल्ट्याउने कसरत भइरहेको बताएका हुन् ।

उनले भने, ‘अहिले निकै चुनौतीपूर्ण अवस्थामा नेतृत्वको अवसर प्राप्त भएको छ । सजिलो छैन । अर्थतन्त्रको कुरा सुनिराख्नुभएको छ । यसलाई पार लाउन सहज छैन । राजनीति पनि कुनै एउटा पार्टीको बहुमत छैन । मोर्चा गरेर नेतृत्व गरेका छौँ । सजिलो छैन । अप्ठ्यारो छ । तर, पनि चुनौतीपूर्ण अवस्थामा छौँ ।’

एक–दुई दिनमा सरकारले शतप्रतिशत पूर्णता पाउने र जनताले राहत महसुस गर्ने गरी नीति तथा कार्यक्रम तथा बजेट बनाउने उनको भनाइ छ । सरकारको ध्यान पूर्णरुपमा नीति तथा कार्यक्रम र बजेट निर्माणमा केन्द्रित हुने बताए । त्यसकै लागि आज सिंहदरबारमा छलफल समेत राखेको उनले बताए ।

अर्को प्रसंगमा उनले सहकारी आन्दोलनलाई पुँजीवादीकरण हुनबाट जोगाउनुपर्ने बताए । सहकारीलाई समाजवादको आधार खडा गर्ने साधनको रुपमा विकसित तुल्याउनुपर्ने उनको भनाइ छ ।