‘सहकारी क्षेत्र धेरै बदनाम भइसक्यो, यो भन्दा धेरै बदनाम हुन नपरोस्’ : अध्यक्ष ओली

काठमाडौं । नेकपा एमालेका अध्यक्ष केपी शर्मा ओलीले सहकारी क्षेत्रलाई प्रोत्साहित गर्दै अघि बढ्न सरकारलाई सुझाव दिएका छन् । काठमाडौंमा आयोजित राष्ट्रिय सहकारी महासम्मेलनमा बोल्दै अध्यक्ष ओलीले एकाध सहकारी देखाएर विरोध गर्ने भन्दा पनि सहकारीको संरक्षण र प्रोत्साहित गर्दै मुलुकलाई आर्थिक संकटबाट जोगाउन सरकारले ध्यान दिनुपर्ने उनले बताएका हुन् ।

ओलीले यति बेलाको अर्थतन्त्रको स्थितिलाई सुधार्न सहकारीलाई प्रोत्साहित र अझ सुदृढ बनाउनुको विकल्प नरहेको बताए । ओलीले अनावश्यक खालको खर्च काटेर सहकारीलाई सबल बनाउनेतर्फ सरकार लाग्नुपर्ने पनि पटक पटक दोहोर्‍याएका थिए । ओलीले सहकारी सञ्चालन गर्न नजान्दा सहकारी क्षेत्रमा समस्या आएकोसमेत दाबी गरेका छन् । उनले भने, ‘अहिले सहकारी क्षेत्र धेरै बदनाम भइसक्यो, यो भन्दा धेरै बदनाम हुन नपरोस् । खासमा यो सहकारी कसरी सञ्चालन गर्नुपर्छ भन्ने नजान्दा आएको समस्या हो । अब सुधार गर्नुपर्छ ।’

अध्यक्ष ओलीले मुलुक आर्थिक संकटमा धकेलिँदै गइरहेका बेला पनि प्रधानमन्त्री पुष्पकमल दाहालले भने ढुक्क, आराम, आनन्द र प्रसन्न चित्तमा ‘कमिटमेन्ट’को वर्षा मात्रै गर्ने गरेको बताएका छन् । मुलुकमा रेमिट्यान्सबाट कर्मचारीलाई तलव खुवाउन पर्ने स्थिति आएको भनिरहेको बेला पनि सरकार र प्रधानमन्त्री दाहालले भने राम्रो छ भनेर बसिरहेको बताए । बैंकले पैसा दिन नसक्ने अवस्था आएका बेला पनि प्रधानमन्त्री दाहालले मुलुकको अर्थतन्त्र राम्रो छ भनेर आश्वासन दिन पछि नपरेको भन्दै ओलीले असन्तुष्टि समेत व्यक्त गरेका हुन् ।