नक्कली विज्ञापन राखी अनलाइनमार्फत ठगी गर्ने हाम्रो बजार डटकमका सञ्चालक पक्राउ

काठमाडौं । आकर्षक विज्ञापन राखेर ठगी गरेको आरोपमा प्रहरीले एक युवकलाई पक्राउ गरेको छ । हाम्रो बजार डटकम नामक अनलाइनका सञ्चालक, हुम्ला घर भई भक्तपुर बस्ने उपेन्द्र शाहीलाई प्रहरीले अनलाइनमा महँगो मूल्यका आइफोन मोबाइल सेटहरू सस्तो मूल्यमा बिक्रीमा छ भन्ने विज्ञापन राखेर ठगी गरेको आरोपमा पक्राउ गरेको हो ।

उनले यसरी विज्ञापन पोष्ट गरी त्यसमार्फत सम्पर्कमा आएका व्यक्तिहरूलाई मोबाइलको मूल्य, डेलिभरी, कुरिअर चार्ज जस्ता विभिन्न प्रयोजनमा रकम लाग्ने भनी रकम ठगी गर्ने गरेको खुलेको छ । उनले मोबाइल खरिद गरेबापत आफ्नो सम्पर्कमा रहेका विभिन्न व्यक्तिहरूका नाममा रहेका बैंक खाता, इसेवा तथा खल्ती वालेटहरूमा रकम पठाउन लगाउने र त्यसपछि सम्पर्कविहीन हुने गरेको पाइएको काठमाडौँ उपत्यका अपराध अनुसन्धान कार्यालयले जनाएको छ ।

कार्यालयका प्रहरी उपरीक्षक रवीन्द्र रेग्मीले उनलाई ठगीसम्बन्धी कसुरमा आवश्यक अनुसन्धान एवं कारबाहीका लागि आज जिल्ला प्रहरी परिसर काठमाडौँमा बुझाइएको जानकारी दिए ।