हतियारसहित चक्रे मिलनका सहयोगी गणेशबहादुर बोगटी पक्राउ

काठमाडौं । गुण्डा नाइके मिलन गुरुङ अर्थात चक्रे मिलनका सहयोगी गणेशबहादुर बोगटी ‘एके ४७’ हतियारसहित पक्राउ परेका छन् । चक्रे मिलन नेपालगञ्ज गएको बेला उनलाई ‘एके ४७’ हतियारसहित स्कर्टिङ गरिएको भिडियो सार्वजनिक भएपछि बोगटीलाई प्रहरीले पक्राउ गरेको हो ।

बैजनाथ गाउँपालिका, नौबस्ता निवासी बोगटीको साथबाट प्रहरीले घातक हतियारसमेत बरामद गरेको बताइएको छ । बोगटीले जिल्ला प्रशासन कार्यालय बाँकेबाट लाइसेन्स लिएको तर उक्त हतियार के प्रयोजनका लागि र कहिले लिएका थिए भन्नेबारे प्रहरीले अनुसन्धान गरिरहेको जनाएको छ ।

नेकपा एमालेमा रहेका चक्रे मिलन युवा संघको महाधिवेशनमा भाग लिन नेपालगञ्ज पुगेको बेला नेपालगञ्जको सिद्धार्थ होटलमा देखिएको बेला बोगटीले चक्रे मिलनलाई हतियारसहित स्कर्टिङ गरेको भिडियो टिकटकमार्फत सार्वजनिक भएको थियो ।