बोर्डको कार्यप्रति निर्माता गिरीको विरोध : ‘व्यक्तिगत आम्दानी मिडियामा वितरण गर्ने अधिकार बोर्डसँग छैन्’

काठमाडौं । निर्माता तथा कलाकार दीपकराज गिरीले चलचित्र विकास बोर्डले वर्षभरि प्रदर्शित चलचित्रहरूको आम्दानी सार्वजनिक गरेकोमा आपत्ति जनाएका छन् । गिरीले फेसबुक स्टाटसमा बोर्डको सो कार्यप्रति विरोध जनाउदै चलचित्र निर्माताहरूको व्यक्तिगत आम्दानी मिडियामा वितरण गर्ने अधिकार बोर्डसँग नभएको बताएका हुन् ।

विकास बोर्डले बक्स अफिसको तथ्यांकलाई आधार मान्दै हिजो २०७९ सालमा प्रदर्शित सबै चलचित्रहरूको ग्रस आम्दानीको सूची सार्वजनिक गरेको थियो । बोर्डको सो सूची सबै मिडियाहरूले प्रकाशित गरेका छन् । यसरी चलचित्र निर्माताहरूको व्यक्तिगत आम्दानी मिडियामा वितरण गर्ने अधिकार बोर्डसँग नभएको उनको तर्क छ ।

निर्माता गिरीले आफ्नो चलचित्र छक्कापञ्जा ४ ले व्यापार गरेको भनेको रकम पनि गलत भएको दाबी गरेका छन् । चलचित्र विकास बोर्डमा भुवन केसी आएदेखि यस क्षेत्रमा भाँडभैलो भइरहेको उनले आफ्नो फेसबुक स्टाटसमा उल्लेख गरेका छन् ।