नेटवर्किङ व्यवसायबाट लाखौँको ठगी गर्ने ३५ वर्षीय महिला पक्राउ

काठमाडौं । नेटवर्किङ व्यवसाय गरी ५६ लाखभन्दा बढि ठगी गर्ने एकजनालाई प्रहरीले पक्राउ गरेको छ । प्रहरीले १४ जना पिडितबाट नगद १७ लाख तीन हजार चार सय र ३६ जना पिडितबाट नगद ३८ लाख १९ हजार चार सय बराबरको रकम‌ ठगी गर्ने काठमाडौं महानगरपालिका–७ चावहिल, गंगाहिटीमा रहेको भिजन ड्रिमरी प्रालिका सञ्चालक धरान उपमहानगरपालिका–१७ की ३५ वर्षीया जुनुकला राईलाई पक्राउ गरेको गरेको हो ।

राईले नेपाली कला र सीपबाट सृजित विभिन्न प्रकारका सामान उत्पादन तथा बिक्री वितरण गर्ने गराउने सम्बन्धी स्वीकृति लिई‌ इजाजतको समेत बर्खिलाप हुने गरी १६ देखि २५ बर्ष उमेर समुहका धेरैजसो युवायुवतीलाई आकर्षक आम्दानी, विभिन्न योजना बनाई वैदेशिक भ्रमण लगायतका लोभन दिई न्यूनतम ११ हजार ३ सयदेखि अधिकतम ५ लाख सम्म तिरी सदस्यता बनाएकी थिइन् ।

राईउपर ठगी सम्बन्धी मुद्दामा काठमाडौँ जिल्ला अदालतबाट दिन ५ को म्याद थप अनुमति लिई प्रहरी वृत्त गौशालाबाट थप अनुसन्धान भइरहेको प्रहरीले जनाएको छ ।