शेखर पक्षलाई ३ मन्त्री र एक राज्यमन्त्री दिन देउवाको सहमति

काठमाडौं । नेपाली कांग्रेसका सभापति शेरबहादुर देउवा र शेखर कोइरालाबिच इतर समुहलाई तीन मन्त्री र एक राज्यमन्त्रीको लागि सहमति भएको छ । कांग्रेस भित्र सहमति भएपश्चात थप ५ जना मन्त्री र एकजना राज्यमन्त्रीको नाम तय भएको हो अब कांग्रेसले थप एक मन्त्रालय पाउने भएपछि शेखर पक्षले ३ मन्त्री र एक राज्यमन्त्री पाउने भएका छन् ।

शेखर पक्षबाट उपसभापति धनराज गुरुङ, मोरङ १ डिगबहादुर लिम्बु र कपिलवस्तु २ का सुरेन्द्र आचार्यले मन्त्री बन्ने मौका पाउने भएका छन् । राज्यमन्त्रीमा जाजरकोटकी मैना रावल कार्कीको नाम नेताहरूले लिएका छन् । देउवा पक्षबाट यसअघि ४ मन्त्री भइसकेका छन् । अब मोहन बस्नेत र एनपी साउद थपिने बताइएको छ । उपनिर्वाचनपछि मन्त्रिपरिषद्ले पूर्णता पाउने बताइएको छ ।

महामन्त्री गगन थापाले प्रदीप पौडेललाई मन्त्री बनाउन दबाब दिएका थिए । तर देउवाले नमानेपछि यसमा गगन असन्तुष्ट रहेको बताइन्छ । कोइराला पक्षले कम्तीमा ३ मन्त्री माग गरेका कारण यसअघि शपथग्रहण हुन सकेको थिएन ।