ढाकाकुमार श्रेष्ठको ठाउँमा बिन्दाबासिनी कंसाकारलाई सिफारिस गर्ने रास्वपाको निर्णय

काठमाडौं । प्रतिनिधिसभा सदस्य ढाकाकुमार श्रेष्ठको पद रिक्त हुने भन्दै राष्ट्रिय स्वतन्त्र पार्टीले नयाँ सांसदमा बिन्दाबासिनी कंसाकारलाई निर्वाचित गर्न निर्वाचन आयोगमा सिफारिस गर्ने निर्णय गरेको छ । बुधबार बसेको पार्टीको केन्द्रीय समिति बैठकले श्रेष्ठको ठाउँमा एसिडपीडित बिन्दबासिनी कंसाकारलाई सिफारिस गर्ने निर्णय गरेको हो ।

समानुपातिक सांसद श्रेष्ठको पद पनि खारेज हुने भएकाले नयाँ सांसदमा बिन्दाबासिनी कंशाकारलाई सिफारिस गर्ने निर्णय भएको सभापति रवि लामिछानेले जानकारी दिए । रास्वपाले प्रतिनिधिसभा सदस्य श्रेष्ठलाई साधारण सदस्यसमेत नरहने गरी कारबाही गरेको छ । मन्त्री बन्न मेडिकल व्यवसायी दुर्गा प्रसाईंसँग रकम मागेको अडियो बाहिरिएपछि विवादमा तानिएका श्रेष्ठलाई रास्वपाको केन्द्रीय समिति बैठकले बुधबार कारबाही गरेको हो ।

तर, राजनीतिक दलसम्बन्धी ऐनमा दुई अवस्थामा मात्र सांसद पद जाने व्यवस्था छ । पार्टीको ह्वीप उल्लंघन गरेका र दल त्याग गरेका सांसदको मात्र सम्बन्धित पार्टीको केन्द्रीय समितिको निर्णय र सिफारिसबाट पद रिक्त हुने व्यवस्था छ । अनुशासनमा कारबाही गर्ने रास्वपाको निर्णयलाई सांसद श्रेष्ठले कानुनी रूपमा अदालतमा चुनौती दिन सक्नेछन् ।