आठौंपटक मन्त्रिपरिषद् विस्तार, परराष्ट्रमन्त्रीमा एनपी साउदले लिए शपथ

काठमाडौं । सत्ता साझेदार दल नेपाली कांग्रेसबाट एनपी साउद परराष्ट्रमन्त्री बनेका छन् । उनले शीतलनिवासमा आयोजित समारोहमा राष्ट्रपति रामचन्द्र पौडेलबाट पद तथा गोपनीयताको शपथ ग्रहण गरेका हुन् ।

यस्तै नेकपा एकीकृत समाजवादीका तर्फबाट नन्दा चपाईं भौतिक पूर्वाधार तथा यातायात राज्यमन्त्री बनेकी छन् । भौतिक पूर्वाधार तथा यातायात मन्त्रालयमा एकीकृत समाजवादीकै प्रकाश ज्वाला यसअघि नै मन्त्री भइसकेका छन् । सत्ता गठबन्धनमा भएको भागबन्डाअनुसार नेपाली कांग्रेसले अर्थसहित आठ मन्त्रालय पाएको छ । जसअनुसार कांग्रेसबाट पूर्णबहादुर खड्का नेतृत्वमा चारजना मन्त्री सरकारमा गइसकेका छन् ।

प्रधानमन्त्रीको भारत भ्रमणअगावै परराष्ट्रमन्त्री नियुक्त गरिएको हो । प्रधानमन्त्री प्रचण्डको यो आठौं पटक मन्त्रिपरिषद् विस्तार हो । आजको मन्त्रिपरिषद् विस्तारपछि पनि अझै ५ मन्त्रालय प्रधानमन्त्री स्वयंले सम्हाल्नुहुने भएको छ ।