प्रतिनिधिसभामा गगन थापाको माग -‘संघीय सरकार र महानगर मिलेर सबै ठाउँमा सिसिटिभी जडान गर्नुहोस्’ 

काठमाडौं । नेपाली कांग्रेसका महामन्त्री गगनकुमार थापाले  शान्ति सुरक्षाको आवश्यक व्यवस्था मिलाउन संघीय सरकार र काठमाडौं महानगरपालिकाले मिलेर सबै ठाउँमा सिसिटिभी जडान गर्नुपर्ने बताएका छन्  । बुधवार प्रतिनिधिसभा बैठकमा आकस्मिक समयमा महामन्त्री थापाले  काठमाडौंमा दिन हाडै हत्या हुने क्रम बढ्दै गइरहेको उल्लेख गर्दै सबै ठाउँका सिसिटिभीको व्यवस्था गर्न सरकारसँग माग गरेका हुन् ।

उनले भने, ‘छुरी प्रहार गरेर हत्या भएको सात दिन भयो । प्रहरी कार्यालय र गृह मन्त्रालय धाइरहनु भएको छ । तर, उहाँहरूले ठोस जवाफ पाउनु भएको छैन । आज संयोगले माननीय गृहमन्त्रीज्यू संसद्मा उपस्थित हुनुहुन्छ । म आग्रह गर्न चाहन्छु ।  यसको बारेमा विश्वास गर्न गर्न स्थिति माननीय गृहमन्त्रीज्यूले बनाइदिनुहोस् । यसको तथ्य सात सात दिनसम्म पनि पत्ता लगाउन सकिएको छैन । यो घटनाको दोषी बाहिर आओस् भन्ने माग गर्दछु । महानगरपालिका, संघीय सरकार मिलेर सिंगो काठमाडौंलाई  सेक्युरिटीसँग जोडेर सिसिटिभी जोडेको भए यो घटनाको तथ्य पत्ता लगाइसकेको हुन्थ्यो ।’ 

महामन्त्री थापाले सो घटनाको सत्य तथ्य तत्काल बाहिर ल्याएर दोषीमाथि कडा कारबाही गर्न पनि सरकारलाई सचेत गराए ।